ත්රස්තවාදය වැළැක්වීමේ පනත (PTA) යටතේ අත්අඩංගුවට ගෙන සිටින හිටපු රාජ්ය අමාත්ය සිවනේසතුරෙයි චන්ද්රකාන්තන් හෙවත් පිල්ලයාන් ලබන අගෝස්තු 4 දක්වා යළි රක්ෂිත බන්ධනාගාරගත කරන ලෙස මඩකලපුව මහේස්ත්රාත් අධිකරණය නියෝග කර තිබේ.
මෙම නියෝගය මඩකලපුව මහේස්ත්රාත් හා දිසා විනිසුරු ඒ. තර්ෂිනී මහත්මිය විසින් නිකුත් කරනු ලැබුවේ සැකකරු ඔන්ලයින් ක්රමවේදය ඔස්සේ අධිකරණයට ඉදිරිපත් කළ අවස්ථාවේදීය.
අදාළ නඩුව 2008 වසරේ මඩකලපුව දිස්ත්රික්කයේ ප්රදේශ කිහිපයක සිදුවූ බව කියන ඝාතන පහක් සම්බන්ධයෙන් අපරාධ පරීක්ෂණ දෙපාර්තමේන්තුව (CID) විසින් ගොනු කර ඇති චෝදනා මත පදනම් වේ.
අද පැවති නඩු විභාගයේදී කල්ලඩි ප්රදේශයේ සිදුවූ ඝාතන පහ සම්බන්ධයෙන් ගොනුකර ඇති චෝදනා තුනක් සහ මෙම නඩුවට අදාළ තවත් එක් චෝදනාවක් සම්බන්ධයෙන් අධිකරණය කරුණු සලකා බැලීය.
දෙපාර්ශ්වය ඉදිරිපත් කළ කරුණු සලකා බැලීමෙන් අනතුරුව මහේස්ත්රාත්වරිය සැකකරු ලබන අගෝස්තු 4 දක්වා රක්ෂිත බන්ධනාගාරගත කිරීමට නියෝග කළාය.
අපරාධ පරීක්ෂණ දෙපාර්තමේන්තුව ගොනුකර ඇති චෝදනා අතර 2008 වසරේ කල්ලඩි මුරුගන් කෝවිල අසල හිටපු පොලිස් නිලධාරියෙකු ඇතුළු පුද්ගලයින් දෙදෙනෙකු වෙඩි තබා ඝාතනය කිරීම, එම වසරේ මැයි 22 දින තවත් පුද්ගලයින් දෙදෙනෙකු ඝාතනය කිරීම සහ අගෝස්තු 20 දින වවුනියාව ප්රදේශයේ පුද්ගලයෙකු වෙඩි තබා ඝාතනය කිරීම සම්බන්ධ චෝදනා ඇතුළත් වේ.
නඩුව සම්බන්ධයෙන් වැඩිදුර විභාගය ලබන අගෝස්තු 4 දින යළි කැඳවීමට නියමිතය.
