යෝජිත 22 වැනි ආණ්ඩුක්රම ව්යවස්ථා සංශෝධනයට එරෙහිව හෘද සාක්ෂියට අනුව ඡන්දය භාවිත කරන ලෙස සර්වජන බලය නායක, පාර්ලිමේන්තු මන්ත්රී දිලිත් ජයවීර මහතා පාර්ලිමේන්තු මන්ත්රීවරුන්ගෙන් ඉල්ලීමක් කර තිබේ.
සැප්තැම්බර් 24 වැනිදා පාර්ලිමේන්තුවේ සියලු මන්ත්රීවරුන් වෙත ලිපියක් යොමු කරමින් ඔහු මෙම ඉල්ලීම සිදුකර ඇත.
අදාළ ලිපියෙන් ජයවීර මහතා 22 වැනි ආණ්ඩුක්රම ව්යවස්ථා සංශෝධනය “අදූරදර්ශී” යෝජනාවක් ලෙස හඳුන්වා දෙමින්, ඒ සම්බන්ධ ඡන්ද විමසීමේදී මන්ත්රීවරුන් තම හෘද සාක්ෂියට අනුව තීරණයක් ගත යුතු බව ප්රකාශ කර තිබේ.
යෝජිත ව්යවස්ථා සංශෝධනයක් ආණ්ඩුක්රම ව්යවස්ථාවට අනුකූලද යන්න සහ එය සම්මත කිරීම සඳහා සාමාන්ය බහුතරයක්, තුනෙන් දෙකක බහුතරයක් හෝ ජනමත විචාරණයක් අවශ්යද යන්න තීරණය කිරීම අධිකරණයේ කාර්යභාරය බව ඔහු සිය ලිපියේ සඳහන් කරයි.
කෙසේවෙතත්, එවැනි සංශෝධනයකින් රටට සහ ජනතාවට යහපතක් සිදුවන්නේද යන්න පිළිබඳ තීරණය කිරීමේ වගකීම පාර්ලිමේන්තු මන්ත්රීවරුන් සතු බව ජයවීර මහතාගේ ස්ථාවරයයි.
විශේෂයෙන්ම නීතියේ ආධිපත්යය, ප්රජාතන්ත්රවාදය සහ ස්වාධීන අධිකරණයක් වෙනුවෙන් අතීතයේ පෙනී සිටි ආණ්ඩු පක්ෂයේ මන්ත්රීවරුන් වෙත ඔහු සිය ලිපියෙන් අවධානය යොමු කර තිබේ.
හිටපු අගවිනිසුරු ආචාර්ය ශිරාණි බණ්ඩාරනායක මහත්මියට එරෙහි දෝෂාභියෝග ක්රියාවලියට විරෝධය දැක්වූ මන්ත්රීවරුන් පිළිබඳවද ඔහු එහිදී සිහිපත් කර ඇත.
මන්ත්රීවරුන් පාර්ලිමේන්තුවට තෝරා පත්කර ඇත්තේ ජනතාව විසින් බැවින්, තීරණාත්මක ජාතික ප්රශ්නයක් සම්බන්ධයෙන් ඡන්දය ප්රකාශ කිරීමේදී ඡන්දදායකයන් වෙත ලබාදුන් පොරොන්දු සහ තම වගකීම පිළිබඳවද සිතා බැලිය යුතු බව ජයවීර මහතා පවසයි.
22 වැනි ආණ්ඩුක්රම ව්යවස්ථා සංශෝධනයට එරෙහිව ඡන්දය භාවිත කරන ලෙස ඉල්ලා සිටින ඔහු, ප්රායෝගික අපහසුතාවකට මුහුණදෙන මන්ත්රීවරයෙකු ඡන්දය දීමෙන් වැළකී සිටීමට ගන්නා තීරණයකටද වැදගත්කමක් ඇති බව සිය ලිපියේ සඳහන් කර තිබේ.
මෙම අදහස් යෝජිත 22 වැනි ආණ්ඩුක්රම ව්යවස්ථා සංශෝධනය සම්බන්ධයෙන් දිලිත් ජයවීර මහතා ඉදිරිපත් කළ ස්ථාවරය වේ.
