සමගි ජන බලවේගය (SJB) ශ්රී ලංකාවේ අධිකරණ පද්ධතියේ පවතින නඩු ප්රමාදයට විසඳුම් සෙවීම සඳහා පාර්ලිමේන්තු තේරීම් කාරක සභාවක් පත් කරන ලෙස ඉල්ලා පාර්ලිමේන්තුවේ කථානායක ආචාර්ය ජගත් වික්රමරත්න මහතා වෙත යෝජනාවක් භාරදී තිබේ.
අධිකරණ අමාත්යාංශයේ දත්ත අනුව මේ වන විට ශ්රී ලංකාවේ අධිකරණ පද්ධතිය තුළ නඩු ලක්ෂ 11කට (මිලියන 1.1) ආසන්න ප්රමාණයක් විභාග වෙමින් පවතින අතර, එම තත්ත්වය කඩිනමින් විසඳීමේ අවශ්යතාව මෙම යෝජනාවෙන් අවධාරණය කර ඇත.
මෙම යෝජනාව විපක්ෂ නායක සජිත් ප්රේමදාස මහතාගේ මූලිකත්වයෙන් සකස් කළ යෝජනාවකට අනුව ඉදිරිපත් කර ඇති අතර, එයට සමගි ජන බලවේගයේ පාර්ලිමේන්තු කණ්ඩායමේ මන්ත්රීවරුන්ගේ අත්සන් ද ලබාගෙන තිබේ.
විපක්ෂ නායකවරයාගේ ප්රධානත්වයෙන් පාර්ලිමේන්තු මන්ත්රීවරුන් පිරිසක් අද එම යෝජනාව කථානායකවරයා වෙත භාරදුන් බව වාර්තා වේ.
නඩු ප්රමාදයට ප්රධාන හේතු ලෙස අධිකරණවල පුරප්පාඩු, නීතිපති දෙපාර්තමේන්තුවේ නීති නිලධාරීන්ගේ හිඟය, රජයේ රස පරීක්ෂක දෙපාර්තමේන්තුව සහ රජයේ තක්සේරු දෙපාර්තමේන්තුව මගින් වාර්තා ලබාදීමේ ප්රමාදයන් යෝජනාවේ සඳහන් කර ඇත.
මේ අතර, අධිකරණ හා ජාතික ඒකාබද්ධතා අමාත්ය හර්ෂණ නානායක්කාර මහතා ද නීතිපති දෙපාර්තමේන්තුවේ අධික කාර්යභාරය නඩු ප්රමාදයට බලපාන ප්රධාන හේතුවක් බව පාර්ලිමේන්තුවේදී පිළිගෙන ඇති බව සඳහන් වේ.
එමෙන්ම බන්ධනාගාර දෙපාර්තමේන්තුවේ දත්ත අනුව, 10,000ක පමණ ධාරිතාවක් ඇති බන්ධනාගාර පද්ධතිය තුළ මේ වන විට 40,000කට අධික රැඳවියන් සිටින අතර, ඉන් සියයට 75ක් පමණ නඩු අවසන් වන තෙක් රක්ෂිත බන්ධනාගාරගත කර සිටින සැකකරුවන් බව ද යෝජනාවේ අවධාරණය කර තිබේ.
ඒ අනුව, ස්ථාවර නියෝග 100 සිට 110 දක්වා යටතේ පාර්ලිමේන්තු තේරීම් කාරක සභාවක් පත් කර නඩු ප්රමාදයට හේතු සොයා බැලීම, කෙටි, මධ්ය හා දිගුකාලීන විසඳුම් යෝජනා කිරීම සහ බන්ධනාගාර තදබදය අවම කිරීම සඳහා නිර්දේශ ඉදිරිපත් කරන ලෙස SJB ඉල්ලා ඇත.
