ශ්රී ලංකා ක්රිකට් ආයතනය සංවිධානය කරන 2026 ලංකා ප්රිමියර් ලීග් (LPL) ක්රිකට් තරගාවලියේ ක්රීඩක කෙටුම්පත් කිරීම සඳහා දෙස් විදෙස් ක්රීඩකයින් 421 දෙනෙකු ඇතුළත් කර තිබේ.
ශ්රී ලංකා ක්රිකට් ආයතනය අද (29) නිකුත් කළ නිවේදනයකට අනුව, එම සංඛ්යාවෙන් දේශීය ක්රීඩකයින් 179 දෙනෙකු සහ විදේශීය ක්රීඩකයින් 242 දෙනෙකු ඇතුළත් වේ.
ක්රීඩක කෙටුම්පත සඳහා තෝරාගත් දේශීය ක්රීඩකයින් ජාතික මට්ටමේ, දේශීය මට්ටමේ සහ නැගී එන (Emerging) ක්රීඩකයින් ලෙස කාණ්ඩගත කර ඇති අතර, විදේශීය ක්රීඩකයින් සහ දේශීය ක්රීඩකයින් ප්ලැටිනම්, ගෝල්ඩ්, ක්ලැසික්, නැගී එන සහ ඇසෝසියේට් ස්ටාර්ස් යන කාණ්ඩ යටතේ වර්ගීකරණය කර තිබේ.
නිවේදනයට අනුව, දේශීය ක්රීඩකයින් අතරින් 17 දෙනෙකු ප්ලැටිනම් කාණ්ඩයට, 34 දෙනෙකු ගෝල්ඩ් කාණ්ඩයට, 80 දෙනෙකු ක්ලැසික් කාණ්ඩයට සහ 48 දෙනෙකු නැගී එන කාණ්ඩයට ඇතුළත් කර ඇත.
විදේශීය ක්රීඩකයින් අතරින් 31 දෙනෙකු ප්ලැටිනම් කාණ්ඩයට, 64 දෙනෙකු ගෝල්ඩ් කාණ්ඩයට, 99 දෙනෙකු ක්ලැසික් කාණ්ඩයට සහ 48 දෙනෙකු ඇසෝසියේට් ස්ටාර්ස් කාණ්ඩයට ඇතුළත් බවද ශ්රී ලංකා ක්රිකට් ආයතනය සඳහන් කළේය.
2026 LPL ක්රීඩක කෙටුම්පත ජූනි මස 1 වැනිදා පස්වරු 1.30ට කොළඹදී පැවැත්වීමට නියමිත අතර, එම අවස්ථාවට ක්රීඩා හා යොවුන් කටයුතු අමාත්ය සුනිල් කුමාර ගමගේ මහතා, ක්රිකට් පරිවර්තන කමිටුවේ සාමාජිකයින්, ශ්රී ලංකා ක්රිකට් නිලධාරීන් සහ සියලුම කණ්ඩායම් හිමිකරුවන් සහභාගී වීමට නියමිතය.
මෙවර LPL තරගාවලිය ජූලි 17 වැනිදා සිට අගෝස්තු 8 වැනිදා දක්වා පැවැත්වීමට සැලසුම් කර ඇති අතර, එය 6 වැනි වරට සංවිධානය කෙරෙන තරගාවලිය වේ.
ශ්රී ලංකා ක්රිකට් ආයතනය මීට පෙර නිවේදනය කර තිබුණේ, මෙවර තරගාවලිය සඳහා විදෙස් ක්රීඩකයින් 650කට අධික සංඛ්යාවක් ලියාපදිංචි වී ඇති බවයි. එම ක්රීඩකයින් ලොව පුරා රටවල් 21කින් සහ ICC පූර්ණ සාමාජිකත්වය දරන රටවල් රැසකින් පැමිණ ඇති බවද සඳහන් වේ.
