විශ්වයේ ජීවය පැවතිය හැකි ග්රහලෝක සොයා යන ගවේෂණයේ තවත් වැදගත් සන්ධිස්ථානයක් සනිටුහන් කරමින්, විද්යාඥයන් GJ 3378b නම් නව බාහිර ග්රහලෝකයක් (Exoplanet) සොයාගෙන තිබේ.
පෘථිවියේ සිට ආලෝක වර්ෂ 25ක් පමණ දුරින් පිහිටි මෙම ග්රහලෝකය, මේ දක්වා සොයාගෙන ඇති ජීවයට හිතකර විය හැකි ආසන්නතම ග්රහලෝක අතරින් එකක් ලෙස සැලකේ.
GJ 3378b අයත් වන්නේ Super-Earth ලෙස හඳුන්වන ග්රහලෝක කාණ්ඩයට වන අතර, එය පෘථිවියට වඩා දෙගුණයකටත් වැඩි ප්රමාණයකින් යුක්ත බව විද්යාඥයෝ පවසති. මෙම ග්රහලෝකය ආසන්නයේ පිහිටි Red Dwarf තරුවක් වටා කක්ෂගතව පවතී.
මෙම සොයාගැනීමේ විශේෂත්වය වන්නේ, ග්රහලෝකය එම තරුවේ ජීවයට හිතකර කලාපය හෙවත් Goldilocks Zone තුළ පිහිටා තිබීමයි. මෙම කලාපයේ උෂ්ණත්වය ද්රව ජලය පවත්වා ගැනීමට සුදුසු විය හැකි බැවින් ජීවය සඳහා අවශ්ය මූලික කොන්දේසි සපුරාලීමේ හැකියාව පවතින බව සැලකේ.
මෙම ගවේෂණය සිදුකර ඇත්තේ ඇමෙරිකාවේ ටෙක්සාස් ප්රාන්තයේ Hobby-Eberly Telescope හි Habitable-zone Planet Finder (HPF) උපකරණය සහ ඇරිසෝනාහි WIYN Telescope හි NEID Spectrograph උපයෝගී කරගනිමිනි.
විද්යාඥයන් පවසන්නේ GJ 3378b ග්රහලෝකයට එහි මව් තරුවෙන් ලැබෙන විකිරණ ප්රමාණය පෘථිවියට සූර්යයාගෙන් ලැබෙන විකිරණයෙන් සියයට 90කට ආසන්න බවයි. එය ද්රව ජලය පවත්වා ගැනීමට සුදුසු පරිසරයක් තිබිය හැකි බවට බලාපොරොත්තු මතු කරයි.
කෙසේ වෙතත්, මෙම ග්රහලෝකය සම්බන්ධයෙන් තවමත් පිළිතුරු නොලැබුණු ප්රධාන ප්රශ්නය වන්නේ එයට ස්ථාවර වායුගෝලයක් තිබේද යන්නයි.
වායුගෝලයක් පැවතීම ග්රහලෝකයක උෂ්ණත්වය පාලනය කිරීමට, අභ්යවකාශ විකිරණවලින් ආරක්ෂා වීමට සහ ජීවයට අවශ්ය පරිසරයක් පවත්වා ගැනීමට අත්යවශ්ය සාධකයකි.
විද්යාඥයන් පවසන්නේ ඉදිරියේදී භාවිතයට පැමිණෙන වඩාත් දියුණු අභ්යවකාශ සහ භූගත දුරේක්ෂ මගින් GJ 3378b හි වායුගෝලය, ද්රව ජලය සහ ජීවයට අදාළ රසායනික සලකුණු පිළිබඳ වැඩිදුර පරීක්ෂණ සිදුකිරීමට හැකි වනු ඇති බවයි.
