ඩොලරයට සාපේක්ෂව රුපියලේ අගය පහළ යාම ඉදිරියේදී පාලනය කරගත හැකි බව අමාත්ය විජිත හේරත් මහතා පවසයි.
අද (19) පැවති කැබිනට් මාධ්ය හමුවේදී අදහස් දක්වමින් ඔහු සඳහන් කළේ, ජාත්යන්තර මූල්ය අරමුදල (IMF) සහ ආසියානු සංවර්ධන බැංකුව (ADB) මගින් ඉදිරියේදී ඩොලර් මිලියන ගණනාවක් ශ්රී ලංකාවට ලැබීමට නියමිත බවයි.
එමෙන්ම ආනයන සීමා කිරීම හරහා ඩොලර් පිටතට යාම පාලනය කළ හැකි බවත්, ඩොලරයේ අගය ඉහළ යාම නිසා අපනයන ආදායමද වැඩිවීමක් පෙන්නුම් කරන බවත් ඔහු පැවසීය.
අමාත්යවරයා පෙන්වා දුන්නේ, මෙම සියලු සාධක සැලකිල්ලට ගනිමින් රුපියලේ අවප්රමාණය කළමනාකරණය කිරීමට රජය පියවර ගෙන ඇති බවයි.
“IMF සහ ADB හරහා ඉදිරියේදී ලැබීමට නියමිත ඩොලර් ප්රවාහයන් සමඟ විදේශ විනිමය සංචිත ශක්තිමත් කරගැනීමට හැකිවෙයි. ඒ වගේම අනවශ්ය ආනයන සීමා කිරීම මඟින් ඩොලර් පිටතට යාම අවම කරගන්න පුළුවන්,” යැයි අමාත්යවරයා සඳහන් කළේය.
ඔහු වැඩිදුරටත් කියා සිටියේ, රුපියලේ අගය පහළ යාම හේතුවෙන් අපනයනකරුවන්ට යම් වාසියක් හිමිවන අතර, විදේශ රැකියා මුදල් ප්රේෂණද ඉහළ යා හැකි බවයි.
කෙසේවෙතත්, රුපියල අවප්රමාණය වීම හේතුවෙන් ආනයනික භාණ්ඩවල මිල ගණන් සහ ජීවන වියදම ඉහළ යාමේ අවදානමක් පවතින බවට ආර්ථික විශ්ලේෂකයින් පෙන්වා දෙයි.
මේ අතර ශ්රී ලංකා මහ බැංකුව නිකුත් කළ නවතම විනිමය අනුපාත අනුව, අමෙරිකානු ඩොලරයක විකුණුම් මිල රුපියල් 342 සීමාව ඉක්මවා ගොස් ඇති අතර, එය 2023 මාර්තු මාසයෙන් පසු වාර්තා වූ ඉහළම අගයන් අතරට එක්ව තිබේ.
