මීගමුව බන්ධනාගාරයේ ඇති වූ ප්රචණ්ඩ ගැටුමෙන් මියගිය පුද්ගලයින් සංඛ්යාව 26 දක්වා ඉහළ ගොස් ඇති බව අධිකරණ හා ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතා ප්රකාශ කළේය.
අමාත්යවරයාට අනුව, මියගිය පිරිස අතර බන්ධනාගාර නිලධාරීන් 7 දෙනෙකු සහ රැඳවියන් 19 දෙනෙකු සිටී.
ජීවිතක්ෂයට පත් බන්ධනාගාර නිලධාරීන් අතර ජේලර්වරයෙකු, ජ්යෙෂ්ඨ නියාමකවරයෙකු සහ තවත් නියාමකවරු කිහිපදෙනෙකු ද සිටින බව ඔහු සඳහන් කළේය.
මේ අතර, බන්ධනාගාර නිලධාරීන් 23 දෙනෙකු සහ රැඳවියන් 54 දෙනෙකු තවදුරටත් රෝහල්ගතව ප්රතිකාර ලබන අතර, බරපතළ තත්ත්වයේ පසුවූ 18 දෙනෙකු වැඩිදුර ප්රතිකාර සඳහා කොළඹ ජාතික රෝහල වෙත මාරු කර යවා තිබේ.
අමාත්යවරයා වැඩිදුරටත් පැවසුවේ, ගැටුම අතරතුර රැඳවියන් විසින් බන්ධනාගාරයේ CCTV නිරීක්ෂණ පද්ධතිය සහ බොඩි ස්කෑනර් යන්ත්රය සම්පූර්ණයෙන්ම විනාශ කර ඇති බවයි.
මූලික විමර්ශනවලට අනුව බන්ධනාගාරයේ සාමාන්ය කටයුතු අඩාල කිරීම මෙම ප්රචණ්ඩ ක්රියාවල මූලික අරමුණ වී තිබූ බව සඳහන් කළ අමාත්යවරයා, ගැටුමට මූලික වූ බවට සැකකරන රැඳවියන් පිරිසක් අඟුණුකොළපැලැස්ස සහ වැලිකඩ බන්ධනාගාර වෙත මාරු කිරීමට පියවර ගෙන ඇති බවද පැවසීය.
මේ වන විට තත්ත්වය බොහෝ දුරට පාලනය කර ඇති බව සඳහන් කළ අමාත්යවරයා, මෙම සිද්ධිය සම්බන්ධයෙන් රජය දැඩි කම්පනයට පත්ව ඇති බවද ප්රකාශ කළේය.
ඔහු අවධාරණය කළේ මෙය රැඳවියන් කණ්ඩායම් දෙකක් අතර ඇති වූ ගැටුමක් මිස බන්ධනාගාර නිලධාරීන් සහ රැඳවියන් අතර ඇති වූ ගැටුමක් නොවන බවයි.
පොලීසිය සඳහන් කළේ, රිමාන්ඩ් භාරයේ සිටින රැඳවියන් පිරිසක් සහ දඬුවම් විඳින රැඳවියන් පිරිසක් අතර මෙම ගැටුම ආරම්භ වූ බවත්, ඊයේ පාලනය කළ තත්ත්වය අද උදෑසන යළි උත්සන්න වූ බවත්ය.
සිද්ධිය සම්බන්ධයෙන් වැඩිදුර විමර්ශන ක්රියාත්මක වේ.
