මීගමුව බන්ධනාගාරයේ පසුගියදා ඇති වූ ප්රචණ්ඩ ගැටුමෙන් ජීවිතක්ෂයට පත් බන්ධනාගාර නිලධාරීන් කිහිපදෙනෙකුගේ පශ්චාත් මරණ පරීක්ෂණවලදී, ඔවුන් බරපතළ ලෙස පහරකෑමට ලක්වීමෙන් මියගොස් ඇති බව අනාවරණය වී තිබේ.
අධිකරණ වෛද්ය වාර්තාවලට අනුව, එම නිලධාරීන්ගේ මරණ සඳහා ප්රධාන හේතුව වී ඇත්තේ හිසට සිදුවූ බරපතළ තුවාල බව හෙළි වී ඇත.
පසුගිය ජූලි 5 සහ 6 යන දෙදින තුළ මීගමුව බන්ධනාගාරයේ ඇති වූ ප්රචණ්ඩ සිද්ධියෙන් මියගිය බන්ධනාගාර නිලධාරීන් සහ රැඳවියන් ඇතුළු පුද්ගලයින් 24 දෙනෙකුගේ පශ්චාත් මරණ පරීක්ෂණ පංච පුද්ගල අධිකරණ වෛද්ය කණ්ඩායමක් විසින් සිදුකර තිබේ.
එම වාර්තාවලට අනුව, මරණ 14ක් වෙඩි වැදීමෙන් සිදුව ඇති අතර, තවත් මරණ 9ක් බරපතළ පහරදීම් හේතුවෙන් සිදුව ඇති බව තහවුරු වී තිබේ. එක් මරණයක් සම්බන්ධයෙන් විවෘත තීන්දුවක් ලබාදී ඇති අතර, ඒ පිළිබඳ වැඩිදුර විමර්ශන තවදුරටත් ක්රියාත්මක වේ.
මේ අතර, කොළඹ ජාතික රෝහලේ ප්රතිකාර ලබමින් සිටියදී ජීවිතක්ෂයට පත් තවත් බන්ධනාගාර නියාමකවරයෙකුගේ මරණය සම්බන්ධයෙන්ද අද (09) මාලිගාකන්ද මහේස්ත්රාත් අධිකරණයට කරුණු වාර්තා කර ඇති අතර, එම මරණ පරීක්ෂණයට අදාළ සාක්ෂි විමසීමද අවසන් කර තිබේ.
මීගමුව රෝහලේ තැන්පත් කර තිබූ මෘතදේහ 28 අතරින් 24 දෙනෙකුගේ පශ්චාත් මරණ පරීක්ෂණ මේ වන විට අවසන් කර ඇති අතර, එම දේහ ඥාතීන් වෙත භාරදී තිබේ. ඉතිරි මෘතදේහ හතර සම්බන්ධයෙන් පරීක්ෂණ තවදුරටත් සිදුකෙරෙන අතර, ඒ අතර ඉන්දීය ජාතිකයෙකු ද සිටින බව වාර්තා වෙයි.
මෙම පශ්චාත් මරණ පරීක්ෂණ සඳහා වෛද්ය සුජීව වික්රමනායක මහතාගේ ප්රධානත්වයෙන් පත් කළ පංච පුද්ගල අධිකරණ වෛද්ය කණ්ඩායමක් කටයුතු කර තිබේ.
මේ අතර, සිද්ධිය සම්බන්ධයෙන් සවිස්තර වාර්තා අධිකරණයට ඉදිරිපත් කරන ලෙස අධිකරණය පොලිසියට ද නියෝග කර ඇති අතර, මීගමුව බන්ධනාගාරය මේ වන විට අපරාධ ස්ථානයක් ලෙස සැලකෙන බැවින් එහි රැඳවියන් තවදුරටත් රඳවා තැබීම සුදුසු නොවන බව අධිකරණ හා ජාතික ඒකාබද්ධතා අමාත්යාංශය ප්රකාශ කර තිබේ.
එමෙන්ම, බන්ධනාගාර පරිශ්රයට සිදුව ඇති හානිය පිළිබඳ අවසන් තක්සේරුවක් මෙතෙක් සකස් කර නොමැති අතර, ඒ සම්බන්ධයෙන් වැඩිදුර කටයුතු සිදුකෙරෙමින් පවතී.
