2025 වසරේ වාර්තා වූ ඉහළ ආදායම් වර්ධනයෙන් අනතුරුව, 2026 වසරේ ශ්රී ලංකා රජයේ සමස්ත ආදායම අඩු වනු ඇතැයි මුදල් අමාත්යාංශය පුරෝකථනය කර තිබේ.
2027 මූල්ය උපායමාර්ග ප්රකාශය (Fiscal Strategy Statement 2027) මගින් ප්රකාශයට පත් කර ඇති මෙම පුරෝකථනය අනුව, ප්රදාන ඇතුළුව රජයේ සමස්ත ආදායම 2025 වසරේ දළ දේශීය නිෂ්පාදිතයේ (GDP) සියයට 16.7 සිට 2026 වසරේදී සියයට 15.8 දක්වා පහළ යනු ඇතැයි අපේක්ෂා කෙරේ.
මෙම අඩුවීම සඳහා ප්රධාන හේතුව ලෙස මුදල් අමාත්යාංශය පෙන්වා දෙන්නේ 2025 වසරේ වාහන ආනයනය යළි ආරම්භ කිරීමත් සමඟ ලැබුණු එක්වරක් පමණක් සිදු වූ බදු ආදායම් ඉහළ යාම සාමාන්ය තත්ත්වයට පත්වීමයි.
වාර්තාවේ සඳහන් වන්නේ 2022 ආර්ථික අර්බුදය සමයේදී රජයේ ආදායම දළ දේශීය නිෂ්පාදිතයෙන් සියයට 8.4 දක්වා පහළ වැටී තිබූ අතර, එය එවකට ලෝකයේ අඩුම ආදායම් අනුපාත අතරින් එකක් වූ බවයි.
ඉන් අනතුරුව හඳුන්වා දුන් බදු ප්රතිපත්ති සංශෝධන සහ ආදායම් පරිපාලන ප්රතිසංස්කරණ හේතුවෙන් බදු පදනම පුළුල් කිරීමට, බදු ගෙවීම් අනුකූලතාව වැඩි කිරීමට සහ බදු මඟහැරීම් මෙන්ම ආදායම් කාන්දුවීම් අවම කිරීමට හැකි වූ බව අමාත්යාංශය සඳහන් කරයි.
කෙසේ වෙතත්, මැද පෙරදිග පවතින භූ දේශපාලනික නොසන්සුන්තාව, ගෝලීය වෙළෙඳාමේ බාධා සහ බලශක්ති වෙළෙඳපොළේ ඇතිවිය හැකි අස්ථාවරත්වය ඉදිරි කාලයේ රජයේ ආදායම් ඉලක්ක සපුරා ගැනීම සඳහා අභියෝගයක් විය හැකි බවද එම වාර්තාව අනතුරු අඟවයි.
