අද (16) උදෑසන වාර්තා වූ දුම්රිය අනතුරට අදාළව දුම්රිය මාර්ගයේ ඇණ ගලවා ඉවත් කළ බවට සැකපිට පුද්ගලයෙකු පෑලියගොඩ පොලීසිය විසින් අත්අඩංගුවට ගෙන තිබේ.
පොලීසිය සඳහන් කළේ, සැකකරු දුම්රිය මාර්ගයෙන් ගලවා ඉවත් කළ ඇණ වෙනත් ස්ථානයකට රැගෙන ගිය පුද්ගලයා බවට මූලික විමර්ශනවලදී අනාවරණය වූ බවයි.
අත්අඩංගුවට ගත් පුද්ගලයා දැඩි ලෙස මත්ද්රව්ය සඳහා ඇබ්බැහි වූ අයෙකු බවද විමර්ශනවලදී හෙළි වී ඇති අතර, ඔහු විසින් දුම්රිය මාර්ගයට සිදුකර ඇති හානිය හේතුවෙන් මගී ජීවිත දැඩි අවදානමකට ලක්ව තිබූ බව පොලීසිය පෙන්වා දෙයි.
මෙම සිද්ධියෙන් අනතුරුව දුම්රිය ගමනාගමනයටද තාවකාලික බාධා එල්ල වූ අතර, අදාළ මාර්ගයේ ආරක්ෂාව තහවුරු කිරීම සඳහා දුම්රිය දෙපාර්තමේන්තුව සහ පොලීසිය එක්ව විශේෂ පරීක්ෂණ ක්රියාත්මක කර තිබේ.
සිද්ධියට සම්බන්ධ තවත් සැකකරුවෙකු සොයා පොලීසිය මේ වනවිට පුළුල් විමර්ශන ආරම්භ කර ඇති අතර, CCTV දර්ශන සහ ප්රදේශවාසීන්ගෙන් ලබාගත් තොරතුරු ඔස්සේ පරීක්ෂණ ඉදිරියට ගෙනයමින් සිටින බව වාර්තා වේ.
දුම්රිය මාර්ගයට සිදුකරන මෙවැනි විනාශකාරී ක්රියාකාරකම් මගින් විශාල ජීවිත හා දේපළ හානි සිදුවිය හැකි බැවින්, දුම්රිය යටිතල පහසුකම්වලට හානි කිරීම සම්බන්ධයෙන් නීතිය දැඩි ලෙස ක්රියාත්මක කරන බවද පොලීසිය අවධාරණය කරයි.
එමෙන්ම, දුම්රිය මාර්ග ආශ්රිතව සැකසහිත ක්රියාකාරකම් දක්නට ලැබේ නම් වහාම ආරක්ෂක අංශ වෙත දැනුම්දෙන ලෙස මහජනතාවගෙන් ඉල්ලීමක් කර තිබේ.
