කුවේට් රාජ්යය වෙත එල්ල වූ බව පැවසෙන මිසයිල සහ ඩ්රෝන ප්රහාර මාලාවක් හේතුවෙන් ඉරාන රාජ්යතාන්ත්රිකයන් දෙදෙනෙකු රටින් පිටුවහල් කිරීමට කුවේට් රජය තීරණය කර තිබේ.
කුවේට් විදේශ කටයුතු අමාත්යාංශය නිකුත් කළ නිවේදනයකට අනුව, ඉරාන තානාපති කාර්යාලයේ වැඩබලන ප්රධානී හමීඩ් යාකුබි ෆාර් මහතා කැඳවා නිල විරෝධතා ලිපියක් භාර දී ඇති අතර, ඉරාන රාජ්යතාන්ත්රික දූත මණ්ඩලයේ සාමාජිකයන් දෙදෙනෙකු Persona Non Grata ලෙස නම් කර පැය 24ක් ඇතුළත රට හැර යන ලෙස නියෝග කර ඇත.
කුවේට් බලධාරීන් පවසන්නේ මෙම තීරණය ගෙන ඇත්තේ රටේ ස්වෛරීභාවය, භෞමික අඛණ්ඩතාව සහ ජාත්යන්තර නීති උල්ලංඝනය කරමින් සිදු වූ බව කියන මිසයිල සහ ඩ්රෝන ප්රහාරවලට ප්රතිචාර වශයෙන් බවයි.
එමෙන්ම කුවේට් රජය නැවතත් අවධාරණය කර ඇත්තේ තම භූමිය හෝ ගුවන් අවකාශය කිසිදු රටකට එරෙහි ප්රහාර සඳහා භාවිත කිරීමට ඉඩ ලබා නොදෙන බවයි.
ඉරානය විසින් අමෙරිකානු හමුදා ප්රහාර කුවේට් භූමියෙන් දියත් කර ඇති බවට සිදුකළ ප්රකාශද කුවේට් බලධාරීන් ප්රතික්ෂේප කර ඇති අතර, එවැනි චෝදනා කිසිදු ආකාරයකින් කුවේට් භූමිය හෝ සිවිල් ස්ථාන ඉලක්ක කර ප්රහාර එල්ල කිරීමට සාධාරණ හේතුවක් නොවන බවද සඳහන් කර තිබේ.
මෙම වර්ධනය සිදුව ඇත්තේ කුවේට් ජාත්යන්තර ගුවන්තොටුපොළ ඇතුළු වැදගත් සිවිල් සහ උපායමාර්ගික ස්ථාන කිහිපයක් ඉලක්ක කර ගනිමින් ප්රහාර එල්ල වූ බවට කුවේට් බලධාරීන් වාර්තා කිරීමෙන් අනතුරුවය.
නිල වාර්තාවලට අනුව මෙම ප්රහාර හේතුවෙන් එක් පුද්ගලයෙකු ජීවිතක්ෂයට පත්ව ඇති අතර, තවත් සිවිල් වැසියන් රැසක් තුවාල ලබා තිබේ. තවද මූලික යටිතල පහසුකම් සහ රාජ්යතාන්ත්රික ගොඩනැගිලි කිහිපයකටද හානි සිදුව ඇති බව සඳහන් වේ.
ජාත්යන්තර දේශපාලන විශ්ලේෂකයන් පෙන්වා දෙන්නේ රාජ්යතාන්ත්රිකයන් පිටුවහල් කිරීම යනු රාජ්යතාන්ත්රික සබඳතා සම්පූර්ණයෙන් බිඳ දැමීමකට පෙර රටක් ගත හැකි දැඩිම ක්රියාමාර්ගවලින් එකක් බවයි. එම නිසා මෙම පියවර කුවේට් සහ ඉරානය අතර ආතතිය තවදුරටත් ඉහළ යාමේ සලකුණක් ලෙස සැලකේ.
