ශ්රී ලංකා රුපියලේ අගය අමෙරිකානු ඩොලරයට සාපේක්ෂව තවදුරටත් අවප්රමාණය වී තිබේ.
ශ්රී ලංකා මහ බැංකුව අද (20) නිකුත් කළ නිල විනිමය අනුපාත අනුව, අමෙරිකානු ඩොලරයක ගැනුම් මිල රුපියල් 332.08ක් දක්වා ඉහළ ගොස් ඇති අතර, විකුණුම් මිල රුපියල් 342.70ක් දක්වා ඉහළ ගොස් ඇත.
2023 මාර්තු 20 දිනෙන් පසු ඩොලරයට වාර්තා වූ ඉහළම ගැනුම් සහ විකුණුම් අගය මෙය බව සඳහන් වේ.
ජාත්යන්තර වෙළෙඳපොළේ බොරතෙල් මිල ඉහළ යාම, විදේශ ණය ගෙවීම් සඳහා ඇති පීඩනය සහ ආනයන වියදම් ඉහළ යාම රුපියලේ අගයට බලපා ඇති ප්රධාන කරුණු ලෙස ආර්ථික විශ්ලේෂකයින් පෙන්වා දෙයි.
විශේෂයෙන්ම මැදපෙරදිග භූ දේශපාලනික උණුසුම් තත්ත්වයන් හේතුවෙන් ගෝලීය ඩොලර් ඉල්ලුම ඉහළ යාමත්, ඉන්ධන ආනයන පිරිවැය වැඩිවීමත් මෙරට විදේශ විනිමය වෙළෙඳපොළට බලපෑම් එල්ල කර ඇති බව සඳහන් වේ.
මේ අතර, රුපියල අවප්රමාණය වීම හේතුවෙන් ආනයනික භාණ්ඩ මිල ගණන්, ඉන්ධන, ඖෂධ සහ කාර්මික අමුද්රව්යවල පිරිවැය ඉහළ යා හැකි බවටද විශ්ලේෂකයින් අනතුරු අඟවයි.
කෙසේවෙතත්, සංචාරක ආදායම්, විදේශ රැකියා මුදල් ප්රේෂණ සහ අපනයන ආදායම් හරහා විදේශ විනිමය ආදායම ඉහළ නැංවීම රුපියල ස්ථාවර කිරීමට වැදගත් වනු ඇති බවද ආර්ථික විශේෂඥයින් පෙන්වා දෙයි.
